ازيكم ياقمرات عاملين ايه وكل عام وانتم بخير
والسنة الجاية اللهم اكتب لنا جميعا حج بيتك الحرام
من شوية كده ياحلوين جت تزورني وتعيد علي واحدة صديقة من باكستان بس ماشاء الله عليها زي القمر وعليها شعر مش هقول لكم بقي ايه ربنا يزيدها يارب.
قلت بقي اسالها ايه سر جمال شعرهم بوجه عام لاني بشوفهم كلهم ماشاء الله شعرهم احلي من بعض طول وتقل و فرد وملمس مش هقول بقي ربنا يزيدهم
الاول طبعا انا عارفة ان تركيبتنا البشرية مختلفة عنهم وكمية الكيراتين عندنا وعندهم متغيره مش زي بعض
وبالتالي طبيعة الاجسام والشعر والبشرة كده مش زي بعضها بس اهه الواحد بقي بيحب يسال يمكن حاجة تجيب مفعول وتخلي الواحد يصحي من النوم يلاقي شعره باكستاني و مفرود وهيلثي كده
فبحب اسال يمكن اتعلم حاجة انا مكنتش اعرفها اهه من تغرب تعلم استفيد من الغربة حاجة ماعرفهاش
السر اللي قالت لي عليه ياحلوين هو فيه زيت واحد بس بيستعملوه علي طول
هو
Mustard Oil
او بالعربي زيت الخردل
بيستعملوه مرتين في الاسبوع
كل مرة بياخدوا من الزيت بحقنة (من غير ابره حقنة تسحب بيها الزيت بيت من الزجاجة) او انبوبة صغيرة و تقسم شعرها عشر خصل من فوق ومن تحت
وفي جدور شعرها تحت كل خصله عند الجدور مش الشعر نفسه تقوم موزعة الزيت بالحقنة
وتفرك جامد جدا جدا جدا جدا في فروة راسها لخصله خصلة وبعدين للشعر كله لما تخلصه كله زيت.
وتسيبه ساعتين وبعدين تغسل شعرها بميه دافية لاهي سخنة والا هي سقعة
وبيتسعملوا صابون زي صابون الشمس عندنا كده مش شامبو والا بلسم والا اي حاجة.
وعلي فكرة قالت لي كمان انه مفيد قوي لشعر البنات الصغيرين ولو حتي عمرهم اسابيع
ومفيد للذاكرة جدا جدا يعني مش للشعر بس
و كل كام شهر بيعملوا حنة لشعرهم بس لازم تتعمل بطريقة من الاتنين اللي هقول لكم عليهم
1- بتاخد شاي عادي و قهوة وتغليهم علي النار كويس قوي
ولما يبردوا تعجن الحنة بالمغلي بتاعهم
2- تجيب بيضة وشوية نسكافيه وتعجن بيهم الحنة
بس قالت لي ان الطريقة التانية للناس اللي شعرها مش بيلمع و فيه شعر ابيض
وتسيبه علي الاقل ساعتين وتغسل الحنة منه
وبس كده ياقمرات
انا عرفت السر ده من صاحبتي وقلت اجي اقول لكم علي طول مهانش عليه بجد اعرفه لوحدي ومااقولكوش عليه
جربوا وقولوا لي رايكم
مش هوصيكم علي التقييم بقي
